دبلومة مهارات البيع النفسي - 6- أنماط شخصيات العملاء

Description

طلع عندنا نوع من أنواع Selling فى آخر 10 سنين اسمه Relationship Selling البيع باستخدام العلاقات الشخصية بالبلدى يعنى اللى قدّامك بيشترى منك علشان بيحبك. طيب إزّاى أخلّى اللى قدّامى يحبنى؟؟ ..لازم أحلل شخصيته كويس علشان أعرف إزّاى أتعامل معاه.. لأن مش كل الناس بقدر أتعامل معاها بنفس الطريقة..

o فمثلا، فيه واحد لو بقيت جد معاه أوى ورسمت وش الجدّية هيقول على "قـتم.. ده الشخص اللى بيحب الهزار والضحك؛ يبقى أنا لازم أخش معاه وأهزّر وأضحك معاه والحاجات دى. لكن لو روحت لواحد ثانى وهزّرت وضحكت معاه كده على طول.. أنت تعرفنى ياكابتن!! بتهزّر معايا ليه!! اتفضل اطلع بره!!.. هيقفل.. هيقول على "تافه" آه يبقى مش هينفع؛ فلازم أعرف مين الشخص اللى ههزّر معاه ومين الشخص اللى مينفعش أهزّر معاه..

· ليه الكلام اللى احنا بنقوله ده؟؟ لأن لكل واحد فينا شخصية مستقلّة.. ولو افتكرت نفسك فاهم البشر تبقى غلطان قوى.. ولو فيه واحد معاه دكتوراه فى البشر وفاهم إنه فاهم البشر يبقى غلطان برده ومبيفهمش حاجة؛ لأنّك كل فترة هتتصدم باللى انت بتسمعه، فمثلا، أنا كنت فى جلسة استشارات نفسية كده فلقيت واحد بيقوللى "أنا بحب جدا وبتمنّى كل الناس تكرهنى!!" أنا قلت ده مريض نفسى؛ فيه مرض نفسى اسمه Sadism اللى هو الرغبة فى تعذيب الآخرين، وفيه مرض ثانى اسمه Masochism اللى هو الرغبة فى تعذيب الذات، بس لمّا اتكلم عرفت إنه مش مريض خالص.. قالك لمّا فيه حد يكرهنى ده بيدّينى حماس أكثر إن أنا أنجح عشان مشمّتوش فيّا؛ والناس مبتكرهش غير الشخص الناجح اللى أحسن منها؛ فلمّا الناس تكرهنى بحس إن أنا أحسن منهم.. يبقى كل واحد ليه دماغه ومينفعش أعامل ده زى ده زى ده.

والهدف من المادة الأولى إننا أقدر أتعامل مع كل شخص بطريقة مختلفة تتناسب مع شخصيته، إن احنا نبقى زى الحرباية نتلوّن بكل لون؛ لو عايز تبقى رجل مبيعات ناجح.. لازم تبقى زى الحرباية!!

TAKE THIS COURSE